««ریشخندی!؟»»

مصطفی خرمی ۳:۳۹ ق.ظ دیدگاه‌ها خاموش
««ریشخندی!؟»»

««ریشخندی!؟»»
****
ایلمَک کدی، دَی دَه کدوم؛ چیمَک کدی، دی ده کدوم
قیروو که بدبورله کدی، قاش و قبغ تو کَل شونه!؟
****
مینجی کدی، دی ده کدوم؛ قینجی کدی«ایرغه» کدوم
اربوو که «قَبَغدَه» کدی، قاش و قبغ تو کَل شونه!؟
****
خنده کدی، خوشال شودوم؛ مزاغ کدی، سرحال شودوم
قیروو که«ریشخندی» کدی؛ قاش و قبغ تو کَل شونه!؟
****10350634_951149008256203_8016511327814836542_n
واده دادی، دی ده کدوم؛ ده دل خوو قن میده کدوم
بیخی تو «مسخیرگی» کدی، قاش و قبغ تو کَل شونه!؟
****
کوزه خوو ره گردو کدی، «اِمیل» خوو ره اوزو کدی
دل ی آشیق بیروو کدی، قاش و قبغ تو کَل شونه!؟
****
مَیدَه مَیدَه گشتون ی تو، سَیدَه سیده اَمدونی تو
کوزه بله گردون ی تو، قاش و قبغ تو کَل شونه!؟
****
لبایی خو ره سُرخی کیده، کومه خوو جَلجَلی کیده
چیمایی خو پُر«سَیی» کیده، قاش و قبغ تو کَل شونه!؟
****
«اونگه»خوو ره که جور مونی، جوانوو ره ناجور مونی
دل ی مو ره بی سور مونی، قاش و قبغ تو کَل شونه!؟
****10610474_684236048329103_3359774935483992294_n
شال ی شری ده بر کدی، نه گله خوو، ده سر کدی
جوانوو ره تو«خر» کدی؛ قاش و قبغ تو کَل شونه!؟

****
دیست پیش کدوم تو قیل کدی، پسکی رفتی تو نیل کدی
تیله دَه دی، توششَه کدی، قاش و قبغ تو کَل شونه!؟
****
خَم خَم کیده خانه موری؛ سربال ده بَلخِنَه موری
لاته خو گولَندَه موری؛ قاش و قبغ تو کَل شونه!؟
****
دانی اورسی شیشتون تو، ایلمک چیمک کَدُون تو
ده «بانه»کوک کَدون تو، قاش و قبغ تو کَل شونه!؟
****
 صبا بخیر خانه اِت میِیم، خانه تو، تلبِستِه اِت میِیم
ده«غلامی» آته ات مییم، قاش و قبغ تو کَل شونه!؟
****
خدا کَنه«خوسته» ات شونوم، رفیق ی بَلخِینه ات شونوم
آشیق ی تو، دیونه ات شونوم، قاش و قبغ تو کَل شونه!؟

******
م، خرّمی
۱۵ / ۱۱ / ۹۵

914بازدید

کامنت بسته شده است.